Версия для слабовидящих
Чыл санында июль 8-те, бүгү Россияда өг-бүле, ынакшыл болгаш шынчы чорук хүнүн демдеглеп эрттирип турар. Ону бир дугаар 2008 чылда — өг-бүле чылында байырлап эгелээн. Христиан шажын езугаар өгленишкен улусту камгалап хайгараар Петр болгаш Феврония дээр бурганчаан кижилерни Муром хоорайда хөөржүткен. Ынчангаш өг-бүле байырлалын тургузар дугайында үзел-бодалды Владимир облазының Муром хоорайының чурттакчылары берген. Россия Федерациязының Күрүне Думазының депутаттарының саналы езугаар байырлалды албан езузу-биле бадылаан.
Күштүг ынакшыл, быжыг эп-найырал, бот-боттарынга хүндүткелден кадык-чаагай өг-бүлелер тыптыр, а бүзүрелдиг өг-бүле эвилелдери ниитилелдиң өзээн тургузуп, чурттуң ниити хөгжүлдезинге салдарны чедирер.
Өг-бүле хүнү-биле, силер бүгүдеге сеткиливис ханызындан изиг байырны чедирбишаан, өг-бүле бүрүзүнге кезээде аас-кежик, өөрүшку арбыдап көвүдезин деп йөрээп, ынакшылды, эп-найыралды, бот ботарыңарны хүндүлежип, карактажып чорууруңарны, ак орукту кузедивис!