Версия для слабовидящих
2023 чылдың июль 27-де 11 шакта Политиктиг кеземче херектер музейиниң чанында «Сактыышкын аллеязынга» (Комсомольская кудумчузу, бажың 5) Оюн Сеңгиижик Тамчай оглунуң (1900-1938) хөрек тураскаалының ажыдыышкыны болуп эртер.
Оюн Сеңгиижик Тыва Арат Республиканың Иштики херектер яамызының сайыдынга, ТАР-ның оран камгалал чериниң даргазынга, ТАР-ның Күрүне прокурорунуң секретарынга ажылдап чораан. 1938 чылда А «контр» дээш тудуп-хоругдадыр үезинде Тыва Арат Республиканың прокурорунуң оралакчызынга ажылдап турган. Бодунуң ажылдап чораан үезинде бодунга-даа, ооң чагыргазынга-даа ажылдап турган ажылдакчыларынга бир дөмей негелделиг, эң ылангыя чамдык берге айтырыгларны кара чааскаан шиитпирлевес, а харын эштериниң сүмезин дыңнаар, коллективтиг шитпирлээр эки чаңчылдыг кижи чораан.
Оюн Сеңгиижик 1900 чылда Улуг-Сайыр баажыңда Эрээң деп черге төрүтунген. Ооң аажы-чаңы топтуг-томааныг бичезинден чүвеге өөрениичели онзагай турган. Межегейниң Алаактан ырак эвесте Берёзовка (Доора-Хадың), Успенка (Кара-Булуң) деп суурларга чурттап турган орус чон-биле харылзажып, орус оолдар-биле кады ойнап өскенинден, орус дылды ол кончуг дүрген шиңгээдип алыр аргалыг болган. Ынчангаш ооң күрүнениң удуртур органнарның ажыл-чорудулгазынга хып дээн аныяк үезинде ажылдай бергени манаа бадыткал болур.
Оюн Сеңгиижик бодунуң үе-чергези Оюн Суванчап-биле өг-бүле чурттап чораан. Олар бир кыс, бир оолдуг чораан. Уруун Санзар дээр, а оглун Арзылаң деп адаар. Уруун Санзар деп адаан ужуру, Оюн Сеңгиижиктин өөн-ишти каш-даа божаан. Ынчалза-даа чаш төлү бүрлү бээр чораан. Тыва чонуң чаңчылы-биле, чаш төлү ызырынмас иелер, чаш төлдү аза-бук албазын дээш багай ат-биле адаар. Ынчангаш кызын Санзар деп адаан ужуру ол. Оюн Сеңгиижик кыстыг, оолдуг, аас-кежик ажылдап, чурттап чораан кижини «контр» деп буруудаткаш, 1938 чылдың 10 айның 16-ның хүнүнде дээди хемчег-биле боолап шииткен.
