ТЫВА СϴСТҮӉ КҮЧҮТЕНИ

С.А. Сарыг-оолдуң 115 чылынга

Национал музей — ϴвүрде

Тываның Национал музейиниң культура, уран чүүл болгаш чурт-шинчилел  килдизиниң  ажылдакчылары Лаида Кара-ооловна Монгуш, Валерия Чаш-ооловна Донгак Ɵвүр кожууннуң төвү Хандагайты суурнуң  Геннадий Тумат аттыг уран чүүл төвүнге Тываның Улустуң чогаалчызы Степан Агбаанович Сарыг-оолдуң 115 харлаан оюнга тураскааткан кожуун чергелиг «Тыва чечен сөстүң күчүтени» деп байырлыг хемчегге киришкеннер.

Национал музейниң шыгжамырында Степан Сарыг-оолдун архивинден ооң ажыл-амыдыралының дугайында делгелге-көргүзүгнү  чонга бараалгадып, чогаадыкчы өнчүзүн көргүскеннер.  

Ɵвүр кожууннуң төвү Хандагайты суурга болуп эрткен хемчегге Национал музейниң ажылдакчыларындан аңгыда, аңаа  Россиянын Чогаалчылар болгаш Журналистер эвилелдериниң кежигүнү, чогаалчы, шүлүкчү, журналист, драматург, Степан Сарыг-оолдүң салгалы — чаңгыс чер чуртуу Нина Даш-ооловна Серенот, Россияның Журналистер, Тываның Чогаалчылар эвилелиниң кежигүнү, билдингир шүлүкчү, очулдурукчу, публицист Чечена Мандановна Монгуш база киришкеннер.

ϴвүржүлер чаңгыс чер-чуртуунуң чараш байырлалынга «Аңгыр-оол — уругларның ынак маадыры» деп кожуун чергелиг өөреникчилерниң уран чурулгазының мөөрейиниң делгелгезин база организастааннар. Ооң-биле чергелештир чогаалчының шүлүк, ыры мөөрейиниң тиилекчилериниң концерти база болган. Кожууннуң чагырыкчызы Айдыс Алексеевич Куулар, культура эргелелиниң даргазы Айдыс Викторович Даржай мөөрей аайы-биле шаңналдарны байырлалды түңнеп тура, тывыскан. Национал музейниң С.А. Сарыг-оолдуң ажыл-амыдыралын чырыткан дерилгелерин көрүп үнелээш, түңнээш, өөрүп четтиргениниң бижиин база тывыскан.

Тываның Улустуң чогаалчызы С.А. Сарыг-оолдуң төрүттүнгенинден бээр 115 чылынга тураскааткан чогаал байырлалынга кожууннуң төпчүткен Монгуш Баянович Доржу аттыг ном саңы, Чаа-Суурнуң Чүргүй-оол  Михайлович Доржу аттыг ном саңы, Дус-Дагның С.А. Сарыг-оол аттыг школазының музейи, Солчурнуң школазының музейи биле ном саңының каттышкан бөлүү, Хандагайты суурнуң бичии уругларның ном саңы дерилге делгелгелерни салып,  идекпейлиг киришкеннер.

Тыва чечен сөстүң күчүтени — С.А. Сарыг-оолдуң 115 чылынга тураскааткан ϴвүрге болган байырлал чараш болгаш бедик деңнелге эрткен.