«АКТЫГ АДЫ ЭГЛИП КЕЛГЕН»

Тыва Республиканыӊ Алдан-Маадыр аттыг Национал музейинге Тыва Арат Республиканыӊ үндезилекчилериниӊ бирээзи, Тыва Арат Республиканыӊ Чазааныӊ кежигүнү, Биче Хуралыныӊ Президиумунуӊ даргазы чорааш, политиктиг репрессияга таварышкаш, актыг черге ялалаткан, тыва чоннуӊ төлептиг оглу Адыг-Тюлюш Хемчик-оол Олдукай-оглунуӊ чырык адынга тураскааткан «АКТЫГ АДЫ ЭГЛИП КЕЛГЕН»-деп Раиса Кызыл-ооловна Донгактыӊ бижээни, чаа чырыкче үнүп келген номунуӊ байырлыг таныштырылгазы хемчег болуп эрткен.

Номнуӊ кол редактору болуп Россияныӊ Чогаалчылар болгаш Журналистер эвилелиниӊ кежигүнү, Тыва Республиканыӊ культуразыныӊ алдарлыг ажылдакчызы, Тываныӊ Ю. Ш. Кюнзегеш аттыг ном үндурер чериниӊ ажылдакчызы Николай Шагдыр-оолович Куулар, а номнуӊ каасталгазын, (компьютерлиг дизайн, верстка) чараштап кылып – Тывада Национал школа сайзырадыр институттуӊ кол редактору — Людмила Аман-ооловна Ооржак ажылдааннар.

Номда ТАР-ныӊ төөгүзү, Адыг-Тюлюш Хемчик-оол Олдукай-оглунуӊ өг-бүлезиниӊ, ажыл-ижиниӊ дугайында база уйнуктарыныӊ сактыышкынарын бижээн. Политиктиг репрессиядан качыгдааннарга хамаарыштыр, оларныӊ актыг, арыг адын эгидип, мөӊгежидер талазы-биле сөөлгү чылдарда эвээш эвес ажылдар кылып чорудуп, уламчылап турар салгалдары бо байырлыг хемчегниӊ аалчылары болуп келген.

Байырлыг сөзүнде Национал музейниң директору Бичелдей К.А. «бо номда, ТАР-ның төөгүзү болгаш Адыг-Тюлюш Хемчик-оолдуң намдарын, ажыл-ижин долузу-биле көргүзүп турар дыка үнелиг материалдар чыып каан дыр. Бо номну орус дылче очулдургаш, «Онзагай кижилерниң намдары» деп циклдиң кезии кылдыр үндүрериниң дугайында боданыры артык эвес».

Иргит Б.Ч., культура өөредилге килдизиниң ажылдакчызы