«ТЫВА ДЫЛЫМ — ҮНГЕН ДӨЗҮМ»

Тыва дыл хүнүнге тураскааткан хемчеглер октябрь 28-те Тыва Республиканың Алдан-Маадыр аттыг Национал музейинге хөйү-биле болуп эрткен.
Оларның аразында бир онзагай мөөрей – квест-оюн «Тыва дылым – үнген дѳзүм». Мөөрей, квест-оюннуң кол сорулгазы – улуг болгаш өзүп орар салгалдарны, төрээн тыва дылынга ынак, тыва сөстерни шын адап, улустуң аас чогаалынга даянып, сагынгыр, тывынгыр чоруун илеретпишаан, аас-чугаа культуразын сайзырадыыры.
Мөөрей фойеге музейниң шыгжамырындан делгеттинген тускай делгелгеден эгелээн. Квест-оюн дөрт кезектен тургустунган турган. Ол дээрге — тыва эдилелдерниң, куштарның, дириг амытаннарның база унуштерниң чиңгине тыва аттарын шын адаары.
Мөөрейге алды аңгы культура албан-черлери база хоорайның садик башкылары киришкен. Оюнну сонуургап аңгы хууда өг-бүлелер база киришкеннер. Тергииннерни хөй, шын айтырыгларга харыылаанындан, салдынган баллдарындан илереттинген.
Албан-черлер аразынга бирги черни төлептии-биле (31,5 балл-биле) Тыва төптүң ажылдакчылары тиилеп үнген. Ийиги черни хоорайның 31 дугаар бичии уруглар садииниң башкылары (31 балл) төлептиг болган. Үшкү черни Тыва Республиканың национал библиотека ажылдакчылары алган (29 балл).
Хууда өг-бүлелер аразынга тергиин билиглерин көргүскен «Ишкин-оглунуң чыынды командазы» кедергей болганын демдеглевес аргавыс чок.
Мөөрейниң киржикчилеринге моон-даа соңгаар музейниң хемчеглеринге эки киржиирин күзевишаан, тыва дылывысты утпазын Национал музейниң мурнундан кыйгырып тур бис!

Материалды культура, уран-чүүл, чүдүлге база чурт шинчилел салбырынның методизи Саая О.В. белеткээн