САМБУУ ИРГИТ — ТЫВА ОЮННАРНЫҢ ЧЫРЫДЫКЧЫЗЫ

Тыва оюннарны чонга, өзүп орар салгалга сагындырып, билиндирер сорулга-биле археолог, этнограф-эртемден, төөгү эртемнериниң кандидады Самбуу Иргит Үӊгүлчековичиниӊ 95 харлаанынга тураскааткан «Самбу Иргит — тыва оюннарның чырыдыкчызы » деп сактыышкын хемчег Национал музейге эрткен.

Музейниӊ хоочунуннары: Майны Биче-оол Салчакович кажан, канчаар таваржып таныжып алаганын, презентацияда чуруктарга тайылбырлап чугаалап берген, а Монгуш Лаида Кара-ооловна шыгжамырда бар Самбуу
Иргиттиӊ коллекциязынга хамаарыштыр илеткелди кылган. Археологияга ооң кылган чүүлдери дыка хөй, ынчангаш бо адырга ооң ажыдыышкыннары-биле таныштырылга солун болган.

Иргит Үнгүлчекович Кызыл хоорайның №9 национал гимназиязының тургустунарга улуг үлүг хуузун киирген. Хемчегниң аалчылары болур Россия Федерациязыныӊ алдарлыг башкызы, Тыва Республиканыӊ улустуӊ башкызы, Кызыл хоорайның №9 национал гимназиязының методизи Домур-оол Валентина Өдүрековна, гимназияда курлавыр этнопедагогика төвүнүӊ удуртукчу методизи Монгуш Екатерина Даш-ооловна өөрүшкүлүг сактыышкыннарны киржикчилерге чугаалап бергеннер.

Россияның чогаалчылар эвилелиниң кежигүнү, Тыва Республиканың алдарлыг культура ажылдакчызы Иргит Лидия Херлии кызы Иргит Үнгүлчековичиниӊ төрел салгалындан болганын дамчыдып, ооӊ өг-булезиниӊ дугайында таныштырган.

Тыва Республиканыӊ күш-культура болгаш спорттуӊ тергиини, чадаг туризм хоочуну, Тээли школазыныӊ география башкызы Айланмаа Сүрүннүӊ Бай-Тайга кожуунда Самбуу Иргиттиң ажылдарын ажыглавышаан, өөреникчилерни ол-ла черлерге чедирип көргүзүп, таныштырып турары онзагай солун болган.

Киржикчилерниӊ сактыышкыннарыныӊ соонда, уруглар тыва оюннарга даяннып, чогаадып каан «Этноэстафета» оюнга идекпейлиг киришкеннер.

Материалды музейниң кол специализи Б.Ч. Иргит белеткээн.