АЛДАН-МААДЫРЛАРНЫӉ ТУРА ХАЛЫЫШКЫНЫНЫӉ 140 ЧЫЛ ОЮНУНГА БЕЛЕТКЕЛ АЖЫЛЫ ЭГЕЛЭЭН

Алдан-Маадырларның тура халыышкынының 140 чыл оюнун 2023 чылдың август 23-24-25 хүннеринде Республика чергелиг деңнелдиг кылдыр демдеглеп эртирер деп турар бис. Ол байырлалды Алдан-Маадырларның төөгүлүг чуртунга — Сут-Хөл кожууннуң Алдан — Маадыр сумузунуң девискээри — Алдан-Маадырларның турлаглап турган чуртту болур Оргу-Шөлдүң, чоннуң ырда кирген, алдаржаан алды баштыг Кара-Дагның баарынга Тыва Чазактың төлээлериниң киржилгези-биле белеткел ажылдарын кылып чорударының дугайында хурал болуп эрткен.

Хуралдың удуртуп баштап турар куратору Чазак Баштыңының оралакчызы Алик Кертик-оолович Монгуш Республиканың аңгы-аңгы яамыларының сайыттарының киржилгези-биле байырлалды бедик шыннарлыг деңнелге эртирер дээш, белеткел ажылдарын кылып, ажылчын байдалга даалгалыг Алдан-Маадыр суурга кээп чорааны бо.

Удавас улуг байырлалывысты Республика деңнелинге Хемчик унунуң чонунуң Маадырлары — Алдан-Маадырларның тура халышкан хүнүнден бээр 140 чыл оюн демдеглеп эртирер бис. Тыва Чазактың Алдан-Маадырларның төөгүзүн үнелеп, ооң ачызындан хөй-хөй чаартылгаларны, күрүне объектилеринге капиталдыг септелгелерни, спорт зал тудуун, Алдан-Маадыр Суг-Аксы аразынга асфальтылыг орук дээш Сут-Хөл кожуун иштинге кылып берип турары улуг өөрүшкү, Сут-Хөл кожууннуң чурттакчы чонунга улуг деткимче болуп турар.

Диана Ховалыг, Тыва Республиканың Национал музейиниң Алдан-Маадыр филиалының удуртукчузу